21. október 2008

Sérkennslustefna Selásskóla er í anda  stefnumörkunar Menntasviðs Reykjavíkur.  Markmiðið er að sinna öllum nemendum svo sem kostur er og nemendur fái kennslu við sitt hæfi.  Í kennslunni er leitast við að styrkja hvern einstakling, bæta líðan nemenda  og byggja námið á styrkleikum nemanda. 

Til að vinna að settu marki er lögð áhersla á sveigjanlega kennsluhætti til að mæta þörfum nemenda.   Að hluta til koma kennarar inn í árganga þannig að svigrúm gefst til að minnka hópa og mæta þeim eftir getu og þörfum einstaklinga. Þeim nemendum sem eiga við námserfiðleika að stríða er boðið upp á aðstoð; ýmist tímabundna í formi námskeiða eða utan bekkjar til lengri eða skemmri tíma.  Í slíkum tilfellum eru foreldrar alltaf hafðir með í ráðum og stefnt að mikilli samvinnu við þá.

Varðandi nemendur með hegðunar- og atferlisvanda verður lögð áhersla á að greina vandann og veita bæði kennurum og foreldrum stuðning í kjölfarið. Lögð verður áhersla á að styðja kennara til sjálfshjálpar varðandi nemendur sem sýna frávik í hegðun.