05. júlí 2010
Vorið hjá 3. bekk.
Á mánu- og miðvikudeginum lögðum við áherslu á að klára verkefni í skólanum. Þriðjudagurinn var helgaður fjallahringnum okkar. Við gengum að skilti austan við Þverás. Á því er myndir og nöfn á öllum þeim fjöllum og fellum sem sjást frá Selás. Síðan gengum við í hádegismóa og litum til Úlfarsfells og sáum Snæfellsjökul í mistrinu. Fimmtudagurinn var helgaður kartöflurækt. Við settum niður útsæðið okkar sem var orðið ansi vel spírað. Vonandi fá kartöflurnar næga sól og vætu í sumar svo börnin í fjórða bekk fái góða uppskeru.
Í dag föstudag fórum við svo í Vinalundinn okkar sem er í Rauðavatnsskógi. Reyndar fengum við vægt áfall í fyrstu þar sem umgengni þar var mjög slæm. Einhverjir höfðu verið með bókabrennu í eldstæðinu okkar og hestamenn höfðu áð með hestana sína við kennslupúltið svo við þurftum að passa okkur á að stíga ekki í hestatað. En nemendur og kennarar í þriðja bekk áttu enn einn frábæran morgun. Börnin léku sér í köðlunum o.fl. og svo eldbökuðum við sykurpúða. Að lokum fórum við heim í skóla og börnin tóku námsbækur vetrarins með sér heim.
